مذكرات ناطور في شبابلك

[Soooon]

كما تعلمون جميعاً شبابلك هو حي شامي أصيل فيه عدة بنايات متجاورة منها بناية كوكتيل وبناية الصفيح الساخن وبناية الاجانب (English Corner) وعدة بنايات أخرى....
وكما نعلم جميعاً أن لكل بناية ناطور مخلص بيدير بالو على سكان هالبناية وبيشوف شو لازمهم....

وفي يوم من هالايام مرق الراوي (راوي هذه القصة) على كل ناطور وصار يسمع منو قصتو ويسجل لنتابع معاً ما قاله بعض نواطير هذا الحي:

ناطور كوكتيل:
اييييييييييييييه هاد يا سيدي سكن عندي بالطابق الرابع فنان شو فنان هلكنا الله وكيلك نازل طالع عم يجيب صور ولوحات .... لك وين عم يروح فيهن ما بعرف حيطان بيتو امتلت وحيطان البناية امتلت وحيطان الدرج امتلت والانكى من هيك انها لوحات مشهورة (مشموسة يعني بلغة النواطير) يعني كلياتنا منعرفها فبتلاقيه طاججلي اسمو على كل لوحة وفرحان بدو يضحك علينا انو من رسمو !!!!!!!!
مالكن بالطويل اجتمعت معو مرة واخدتو عجنب وقلتلو: يا اخي يا ابو فلان الله يرضى عليك خففلنا لوحات والله البناية رح تهبط من تقل دمك ... قصدي من تقل لوحاتك... الله يرضى عليك شيلن اذا بتريد يعني مشان ما اضطر شي يوم (آسفاً) اني شيلن انا من البناية....
الله وكيلكن هيك حاكيتو وبيناتنا وبدون ما حدا يسمع وقلتلو اذا بتريد الله وكيلكن....
بيقوم الافندي بيجمع هالجيران وبيعمل قصة طويلة عريضة وبيتهمني انو انا اهنت كرامتو وانو هددتو وانو انا غيران من جمال لوحاتو... عليي ما عليي اشتهيت ليحو كف اقلبوا بس قلت لحالي يا ولد خليك ساكت لنشوف الجيران شو بدن يحكو....
مو تاري الجيران نصن رفقاتو !!!! أي والله يا شباب رفقاتو وحبايب قلبو شلة يعني ونزلولك فيني بالدور زف بهادل ومحاضرات, وبعد شوي كتر خيرن في كم واحد من سكان الحي ونواطير البنايات التانية حاولوا يشرحوا لو الوضع وانو هيك ما بيصير وعبس...........
من حسن الحظ اني كنت تارك المسجلة شغالة والحديث يللي دار بيني وبين الجار ابو فلان مسجل كلو قمت اجيت وسمعتو للناس انو تفضلوا انا شو غلطت ؟؟؟
ومع هيك ضل هو والجيران صحابو نازلين فينا بهادل.....
هيك لحتى قررنا كم ناطور من نواطير الحي نروح لعند المختار...
وبمكتب المختار قلنالو هيك هيك القصة قام عصب وقال لااااااااااااااااء هي مهزلة وهالحكي ما بيصير وحاجة بقى سلبة اصلاً كلياتنا منعرف انو هي اللوحات مو رسمو !!!
والله هي كانت فكرة المختار وقال تركوني اتصرف...
طلعنا نحنا النواطير وكانو ارتدت النا الروح من حديث المختار أي والله الله يخليلنا ياه وانتظرنا تاني يوم بفارغ الصبر لنشوف شو بدو يصير...
تاني يوم لقينا المختار سكر الاجتماع تبع لجنة البناية وصرف العالم أي والله كتر خيرو بس لحظة ... ايه .... معقول ؟؟؟؟ المختار دعا كل الحي لاجتماع بدو يقول شي مهم ... بسيطة رحنا يا معلم ويا ريتنا ما رحنا...
قينا المختار عم يقول انو نحنا النواطير شايفين حالنا وعم نستغل مناصبنا (حطولي خط تحت مناصبنا) مشان نحرق لجار ابو فلان وفنو الرفيع !!!!!!!!!! شيه لك امبارح كنت عم تقول انو هاد مو فن هاد مهزلة !!!!
والله يا جماعة كانو مختارنا وكبير الحي طرقنا كف متل فراق الوالدين ولهلق مجروحين منو....

================== يتبع ===================

الحلقة القادمة ناطور بناية الضحك....

[حشيشة]

محسوبكن حشيشة ...

ناطور بناية الضحك ...

أنا مشكلتي مع الزفر ...


نحنا مركبين شفاطات قوية لسحب كل الدخنة والزفر من البناية ....


مو مشان شي .. بس لأنو سكان الحارة ما بيحبوا الأكل الزفر ...


وما في كل ما بيجي واحد جديد على هالحارة ..


بيبلشلكون بهالطبخات الزفرة ... وعلى زفر طالع .. وزفر نازل ...

ونحنا ( أنا وأخي أبو البيس ) على تنضيف من وراه .. وتذكير بنوع الطبخات المطلوبة ....

بس منيح ..

يعني مع الإيام عم يتعود السكان الجداد على الوجبات الخفيفة .. وسهلة الهضم ...


بالمناسبة في عنا كم شقة فاضيين وإطلالتهن حلوة على بنايات الأجانب ...


على سيرة بنايات الأجانب ...





أخوكن الخالص ،،،

حشيشة sh:eye

[Soooon]

غود ايفينينغ غايز (يعني مسا الخير شباب) الله وكيلكن التوء لساني من ورا معاشرة الاجانب....

محسوبكم سوووون ناطور بناية الاجانب في حي شبابلك....

انا يا جماعة قصتي انو بحب الانكليزي كتير والحمدلله عندي اساس قوي ودعمتو بدراستي للسياحة ودبلوم الادارة التسويقية يللي اخدتو من شهر (واستحيتوا تقولوا مبروك) .... حاصلو مالكن بالطويل ....
يا جماعة طلبت من المختار انو يعمرلنا بناية خصوصي للاجانب مشان نجمع فيها اجانب الحي بركي بقدر شوي ساعدهن منو بستفيد وبقوي لغتي شنو الموضوع ممارسة ومنو بفيد اهل الحي الاجانب...
والله يا جماعة انا طلبت هالبناية لانو الحي كلو مافي هيك شغلة وبعد هاد كلو بيقول المختار انو لبى طلبي وبنالي هالبناية !!!!!!!
طيب يا مختارنا يا كبيرنا .... انا شو اجاني من البناية ؟؟؟ والله بس كنت حابب قدم شي بقدر فيد غيري فيه ....
الراوي (نعتذر عن اتمام التسجيل لان الدموع منعت الناطور من اتمام كلامه)...

====== يتبع =====

الحلقة القادمة مع ناطور بناية السينما

[Nany]

محسوبتكن ناطورة بناية قريتلك يعني بالفصحى قرأت لك
انا يا جماعة مالي جديدة على الشغل يعني شاغلة بهل مصلحة قبل هلا بس شو كنت اشتغل ببلاد الخليج هنيك كان في مردود يعني بصراحة هاد الصيت يلي طالع عليهن انو ما بيستقبلو الضيف صيت مو صحيح منوب شنو كانوا حاطيني على راسن.
بس الله يقطع هل قلب الشرشوح يلي عندي الت بعقلاتي يا بنت شو بدك بهل غربة , قمت رجعت لبلدي , يعني اول ما رجعت كان ربكن ساترها ومعي مصاري مكفيتني فكنت شوف هل نواطير زملائي من بعيد لبعيد وكتير امران كانت تدب فيني الحماسة وساعدن هيك لحتى اجا اليوم يلي خلصوا في مصرياتي بنفس اليوم ضربت عيني على بناية منها الها ما عليها ناطور الت مافي كلام لازم اشتغل فيها اشتغلت فيها من حالي بدون ما احكي مع المختار بس بعد كم يوم لقيت حالي انو لازم يكون معي مفاتيح البناية لحتى اقدر اشتغل من قلب ورب.
وهيك ما لقيت الا المختار الله يديمو فوق راس هل نواطير يلي متل حكايتنا قلي خدي هي المفتاح وشديلنا همتك ، وحاولت شد هل همة بقا اول شي رتبت هل بناية وهلا عم حاول جيب مستأجرين جداد.

شو في حدا عم يدور على بيت للاجارsh:eye sh:eye
وهاي هي يا جماعة قصتي بشغلي

بس امبارحة سمعت ناطور بناية الرياضة المحلية عم يحكي قصتو قام كتير عجبتني مشان هيك بدي اطلب منو قدام كل هل سامعين انو يحكيلنا قصتو

[ابو السوم]

--------------------------

اييييييييه ميت أهلا وسهلا ...كاسة زهورات للشباب يا سمسوم...
سمسوم : حاضر يابيييييي

والله ياعيني مابعرف شو بدي أكتب بهالمذكرات ..يعني أساسا مافي مذكرات ...فهمانين يابي ..تأبشوني كلكون ... مافي مذكرات ولا قيقان...
بس من أول ما سكنا بهالحاره يا شباب..وأنا عم حاول ابني بهالبنايه طوبة ورا طوبة ...معلومكون بناية الرياضه بدها شغل ومتابعه...شيل وحط...الله وكيلكون يا جماعة الخير..كان مالي شغله ولا عمله الا هالبنايه ..كل يوم من وجه الصبح ..أبلش شغل بهالبنايه ..مع اني كنت حس...
كنت...تعو قربو هالناح عميييي لقلكون...
كنت حس حالي منوذ ومو مرغوب فيني من جماعة البنايات التانيه...غيرة وحسد عمييي....مع اني مو عامل شي..الله وكيلكون يا شبيبه ...
قال شو ... هالبنايه مالها طعمه ..قلنالون يا جماعه هالبنايه الرياضيه ضروريه ومهمة .. بس انتو افهموها على حقيقتا ...عبث يا جماعة الخير...
المهم مالكون بالطويله...الكون بالوسط...أو خدوها قصيرة ...المهم ..بجهدي وجهد كم واحد من الشباب الطيبه بنينا هالبنايه وزرعنا الورود بقلبا ..وضلت عم تكبر يوم ورا يوم على قولة ستي سميرة سعييييييد ...
بنينا هالبنايه بتعبنا وجهدنالحتى صارت أكبر من بنايات الجيران...وصارت تكبر وتكبر بمحبة أهلا ......شنو كنا أول بناية بتوصل للطابق الألف...
وبليلة مافيها ضو قمر يا جماعه...قال شو ...رايحه البنايه بالقص الجديد اللي بدها تعتمدو الدولة...ودون ماياخدو مشورتنا ولا يسألونا عن رأينا ياجماعه ..ماشفنا الا الجرافات والتركسات عم تهدم بهالبنايه ...وكل طوبة الله وكيلكون صار ماينعرف محلا...
فقنا الصبح لقينا حالنا بالشارع...ايه بالشارع ياجماعه...حاولنا نستفسر ونسأل مافي خواااص ..حاولنا نسترجع شي من هالبنايه شنو كان النا وراق هامة متل الملكيه وغيرو وغيراتو...بلا فايدة...
نقلونا لشقفه بعيده ...ولحشونا .. لا مواصلات ولا خدمات....وهداك يوم وهاد يوم...
بيني وبينكون ..مو حلوة الواحد يدخل عالحاره يقوم يشوف بناية الرياضه أعلى بنايه وشبابها أنشط شباب...هيك بنفهم نحنا...مشان هيك ...
صار اللي صار...
بس هلاء عم نبني البنايه من أول وجديد ..
وبكم كاسة كوكتيل ..بيمشي الحال عميييييييي...
وعلى أقل من مهلنا يابيييي ..
وهي نفس المعسل لعيون الشباب....
وقررررررررررررررررررررررررررررررررر...
ميزة وحده عندي هون بالبنايه...التغطيه للأحداث الرياضيه ... يعني بنقعد قعده حلوه شروا هالقعده ...وبنحلل وبنغطي...
بس ترا التغطيه هون بالقسم عندي منيحه كتير...
علي سيرة التغطيه...
تعوا نسمع قصة ناطور بناية الموبايلات...؟؟؟؟

=================sh:hi

[engafw]

شو هالحكي الشامي الغير شكل...........إيه ما عرفتك يا أبو السوم.....فكرتك من الصالحية أو من القنوات........لا تصدق من أول كم كلمة عرفتك حلبي يا معلاقي...........

ناطور الموبايلات ما لو لا قصة ولا سيرة.......كله على بعضه زلمة مهووس بالتكنولوجيا والسرعة.........من شان هيك.......لقى حالو بموضوع الموبايلات.......خصوصي أنو شريكه أمير ولا كل الأمراء......
الموضوع الحساس أنو هو على أساس لح يصير مهندس إلكترون.....وهوسه بالإلكترون هو الاتصالات يعني كل شي ألو علاقة بنقل حكي من زلمة لزلمة والأنكى من هيك الصور كمان إذا بدك.......
فهكذا لف كل الأقسام ونقى قسم الموبايل وقرر يصير ناطور عليه......ويشارك بالنوطرة عليه الأمير الناطور.......

المهم بين يوم وليلة صار ناطور على بناية عليها أكبر برج موبايل بكل الشام........وكل ما عليه أنو يلف ويدور حوليها ويلمع هالأبراج......
أهم شي أنو دائماً في عندنا تغطية.......لأنو البرج يلي حامله أنا بيكفي بلد........
الحمد لله السكان عندي ما في منهم بالعكس كتير مناح ومواضيعهم واجتماعاتهم كتير حلوة........ورايقين وأحلى من هالشي كله أنو أنا اسمي على المنتدى صعب من شان هيك ما حدا بيتحركش فيني من شان ما يكتب اسمي.........ههههههههههه مهووووس مو بيإيدي...
وشغلهم الشاغل السكان عندنا هي الميسد كولات.........يعني إذا واحد بدو يزور التاني بيعمل لو 2 ميسد كول.....يعني أنا جاية أشرب عندك فنجان قهوة........وإذا كان برات البيت وراجع على البيت بيعمل لو 3 ميسد كول........وهكذا.......ميسد كولات طول النهار.......بس في عندنا شغلة غريبة.......أنو نحنا ما عندنا مسجلات بالبناية.......إذا شي واحد حابب يسمع شي غنية بيفتح على نغمة موبايله........
على بالكم تسمعوا شي غنية........متل مثلاً يا غالي!!!!!!!

بس يلي قارق راسنا جيرانا تبع الرياضة.......المشكلة أنو نحنا صايرة بنايتنا بالنص.......لسه تبع الرياضة قارقين راسنا طول النهار على تعوا نلعب سوا وتعوا نحكي على الرياضة........وجيرانا تبع السيارات خود على تشفيط طول النهار......ولا أحلى شي بناية الضحك تبع الحشيش.....ولي لح نروح فيها.......
بس كله كوم وجيرانا تبع البحصة.........قصدي هدول يلي عم يبيعوا برامج كمبيوتر...........لسه طول النهار الناطور على قرب قرب أحدث البرامج عندنا قرب قرب.......برامج كمبيوتر مختلفة.......
فيا ريت حدا يشوف شو قصة هدول جيرانا تبع البرامج الكمبيوتر.....

[voodoo]

أيـــــــــــــــه يا زمن أحم أحم... يلاه يلاه ...مرحبا يا رجال :)

أخ يا راسي لا تذكروني ببنايتي مشان الله

sh:ohmy

يا جماعة هادا كنت بزمناتي زلمة ولا كل هالزلم بهالحارة من الصبح للمسا راكض من بناية لبناية عم بشتغل وطالع يلي فيه النصيب وأعود نقي الشغلة المحترمة يعني ما أشتغل شغلة هيك هات ايدك ولحقني لاءءءءءءء لأني كنت كتير أنأرئ من هالشباب يلي بيشتغلوا شغل التنبلة هادا
المهم وبلا طول سيرة يوم من هالأيام رايح على البريد لبحبش فيه بلكي شي يوم من هالأيام بتجيني رسالة من هالقرايبين أو هالرفقات حاكم ماحد بيتذكرني بالسنة مرة

تنسوني كل سنة مرة حـــــــــــــــــرام تنسوني بالمـــــــــــرة حرام تنسوني بالمــــــــــرة ترترترم

على أولة ستنا أيههههههههههههه الله يرحم ترابها sh:angry

أح أح أح أعععاه
لا تواخذوني يا رجال هادا الدخان عم يجي ناشف بهاليومين ماعادوا زبطوه ال دخان شرق........... أل أص الله ايامك يا لف كنا مبسوطين أل صرنا أكابر ال



المهم بلا منئودية أنفلجت أنو أنلطشت بوشي هديك الرسالة كانت من مختارنا الله يخليلنا ياه أنو استلم البناية يلي بالبحصة . يالطيف شو انبسطت أنو لقيت شغل مستقر ولح طالع رزقي فيه .
وكانت فاضية هالبناية والغبرة هالأد عليها وليييي شو أكلت هم شطفها وزرع الورد بجنينتها وأخدنا أوضة بسفل هالبناية والحمد لله مستورة .

والله وكيلكون صرت صلح وجلس فيها لك ماخليت بلوكة ما نطتتها لفوق وزبطتها ودهنتها والحمد لله صارت البناية وتصورت بس لأحكيلكون بقا على هالسكان المحترمين :

هادا يا سيدي ما أنتة وياه وياها السكان كلون أكابر ويا سلام وأغلبيتون اصليين معي وتمام التمام بس هالكيني بكم شغلة sh:eye


تعى يا أبو الفود نط لعند السمان كوكيل أو أبو داون لود وجبلنا كراك لهالبرنامج .

تعى يا ابو الفود أنينة الغاز ماعم تشتغل على غاز التونل tunnelهادا (غاز اصلي وشغل برا الله وكيلكون )شفلنا شو قصتها .

تعى يا ابو الفود نط لعند الخضري بطرطيرتك تبع لوحة التحكم وبعتلنا طريقة تحميل الصور بس ع الهسي ها . وأنا كنت بزمناتي حاطط بكريدور البناية كرتونة هالأد أدها بلوحة الأعلانات عن الطريقة .

تعى يا ابوالفود ساعدنا شوية بالتعزيل حاكم فرمتنا وما عاد اقدرنا نكمل .


بس الحمد لله اخر فترة ارتحت لأنو أجى اخي الناطور التاني ايفل 77 وعم نتساعد لحنا التنين حاكم بتعرفوا الشغل كتير ومتعب وبناية كبيرة


أأأي أيــــه بس شو بدنا نساوي الحياة صعبة والله يا شباب

هداك اليوم وأنا أعد بهالجنينة عم بصقي زرعاتها وعم بطلع لأخر هالشجرة وعم أول لحالي بدي اص هالعروق الزيادة شفتلكون أخونا يلي أسموا أبو تروجان الهكرجي هادا من حارة السبع حارات وساكن جديد
بيجيلك وهو ساكن بالطابق الأول بيفتح هالأباجور وبيضل يتناؤء على هالبيوت بالناضور.......... وبيلتصص عليهون ويالطيف على هالعادة يا شباب . وأكتر من مرة مسكناه عم يسرق الغسيلات المنشورين بالجنينة .

لك وما بيبطلها لاء والأنكى من هيك في أبو سلبة يلي عاملي أنو هوه عبقري وهالك هالسكان بعبقريتوا تعوا أنا بساويلكون هيك وبشغللكون هالبرنامج صوت ع الأنترفون وبركبلكون اصنصير بالتوك وكاميرات مراقبة على البواب مع الصوت وبيفكلكون هالبروكسي.

وخدوا على كششششش وأل شو أنتوا بس اتصلوا فيني ع الأيميل.

الله وكيلكون مفكر حالو ساكن بحارة الدليل أو الوسيط .sh:angry

لك أأأأخ أأخ على بابا يا ماما مو عرفان وين واقع بس هالدراويش يلي بهالبناية في كم واحد مصدقينوا .

المهم والله يا جماعة مع كل هاد سكان بنايتي أكابر ومحترمين ومافي منون لولا التسع وتسعين علة:)
بس مو متل سكان بناية الأستقبالات يلي مواجهنا الله وكيلكون هالكيني بضوجتون وعجقتون وزلاغيطون وبناية الله وكيلك فايتة بستمية حيط بس الحق على ناطورتون

وينها هيه يا جماعة معنا هون بالسهرة لا لاء ؟؟sh:hi


صبلنا كاسة شاي سمسووووووووووم الله يرضى على ابوك :)

[جورية]

بسسسسم الله الرحمن الرحيم
اصدقائي الغالينننننننننننننن


طيب سون ماشي الحال
انا عندي مكتب متواضع تحت الدرج اسفل البناية
بعقد طول النهار و انا عم رحب بشب و اهل بصبية
و هات يا شاي و هات يا قهوة
و كل شوي بقوم و بقعد و طبعا لازم كون لابسة كعب
عالي منشان الشياكة يعني مو حلوة قدام العالم
و اخخخخخخخخخخخخخخخخخ رح افطس يا جماعة
و احلى الشي انه كل دقيقتين بدي عبي استمارة
منشان التمليك بالشقة و طبعا هات يا كتابة و هات يا ختومات
و طوابع منقلهم هاتوا 100 ليرة حق الطابع بيقولوا
غالي يعني معقول طابع لبيت ملك و ما يكون غالي يعني سمعه
لك بيكون معهم الاخضر و الاصفر وقت بيوصل الشغل
و الدفع لعندي بيصيروا بيحسبوهاااااااااااااااااااا
و طبعا هذا عدا الورد و خناقاتي مع صاحب الورد
يوم بيجيب كمية قليله و يوم كمية دبلانة و شو عرفني
لك و الاحلى من كل الشي في ناس بتجي عم تضحك
و ناس مكشرة و ناس حاطه خمسين عقدة و طبعا
وظيفتي فك عقد انا يا حسرتي على حالي
و هذا بيعجبه البيت و هداك بيقلي ناقصها شي
و التالت بيقلي خربان مدري شو و خدوا على شكاوي
و اغرب شييلي بيقلك شو في يا خانوم بدك تعطيني
شقة و لا لاء بدك بدك ما بدك احسن
لك ااااااااااااااااااخ شي بيجنن
و انا بكون مفطوسة شوب و رطوبة و بتلاقي
الشباب فايقة و رايقة على الاخرررررررررر
بس بتعرفوا في شغلة رهيبة عندي بشوفها
وقت بلاقي صبية نزلت لعندي على المكتب
يييييييييييييييييييييييييييييييييييييييييييييييي
خمسين الف شب لحقها منشان يرحب فيها و يقلها
شرفتينا و انستينا يا ريتك تكوني جارتنا
غريب هل الشي مو
ايه يا شششششششششباب الشكوى
لغير الله مزلة شو بدنا نعمل النا الله يعينا
و عجبي

[ليـــمون]

ايييههههههههه والله ...


ياسيدي انا عندي ميزة كتير حلوة ..مرتااااح ومبسوط .

البناية تلات ارباعها مهجورة , والريح عم تصفر بين شقة وشقة .

السكان مابيطلعو شي خمسة ..

يعني مافي هالعزاب بشطف الدرج .. ولا بعازة مراوح مشان الزفر ..

ولا اطلع وانزل محمل غراض لمرت هاد ..أو مرت هداك .

والسكان اللي عندي كتير أوادم ..لا من تمّون ولا من كمّون .

بس الا ما يحدث ويصير كم شغلة , والله بعينا عليها .

وخصوصي انه معي ناطور تاني بنفس البناية (فاعل خير ) الله يجزيه ,

بيحمل شوي عني ..

ناطور بناية الالكترونيات

ليمون

[osama_brd]

مرحبا يا أبضايات ... على راسي كل الزكرتاوية والله ...

أنا شغلة الناطور كنت كتير عم أهرب منها يعني كنت قاعد لحالي وكافي خيري شري عم فوت من بناية لبناية واقعد من الشباب والصبايا ونحكي ونمزح ونتناقش بأمور كتير حلوة وظريفة متل شباب المنتدى ....
المهم يا مرحومين البي كنت فوت كل مدة على بناية الستلايت ...
شو ماعرفتوها ... والله أكيد مارح تعرفوها يعني قليل الي بيزورها ..
طيب هي البناية بالسويقة وإذا حدا بده يجي أهلاً وسهلاً ...
المهم شافني ناطور البناية وهو كتير حباب ومدري ليش طلب اني اشتغل معه ...
بصراحة كنت كتير خايف بس شو بدنا نساوي لقيت كل السكان بدهن أني كون ناطور معه ...
استلمت النوطرة مه الناطور فينوس وآآآآآآخ ... صرت ضل قاعد من الصبح للمساء وكل ما شوف حدا فايت على البناية اركض بإيدي ورجليي مشان نقوم معه بالواجب ... بس للأسف بيفوت وبيطلع بسرعة وماعاد يجي إلا بعد مدة طويلة ...
صرت شجع الزوار يجوا لعنا وصرت حطلهن مواضيع عن الستلايت وكيف الواحد بده يستقبل المحطات وكل شيء جديد وشو عم يفتح وشو عم يسكر ...
بس الشكوى لغير الله مذلة يعني قد ما عم حط عم يضلوا الي عم يفوتوا على البناية قلال كتير مع أنه كل الناس عندها صحن ورسيفر ومدري شو ببيتهن بس شو بدنا نساوي .....

بس أنا ما رح مل ورح ضل حاول أدعو الناس للدخول لعندنا على البناية ... ولك مستعد ركب على الأسطوح صحن 10 أمتار مشان تطلع كل المحطات ....

بخاطركن
ناطور بناء الستلايت
أسامةsh:hi