شهادة خبرة ... Experience Certificate

[7sam]

شهادة الخبرة
هي مستند رسمي تطلبه منك أي شركة تريد الانضمام إلى طاقمها، عادة تحوي هذه الورقة رسالة من الشركة التي كنت تعمل فيها مسبقاً لتضمن أنك كنت تعمل عندها بنفس الوقت المسجّل في سيرتك الذاتية وبنفس مجال العمل وبنفس المنصب.

احرص دوماً على أخذ شهادة خبرة عند تركك لوظيفة ما.

في المشاركتين التاليتين النص المثالي لشهادة الخبرة باللغة العربية والانجليزية حال الحاجة إليها

ملاحظات هامة:
- يجب ملء الفراغات بالصيغة المناسبة وحبذا لو تكون الكتابات الموجودة مكان الفراغات بصيغة الخط العريض Bold
- يجب أن تكون الورقة مطبوع عليها ترويسة الشركة مع شعارها وأرقام الاتصال بها، ويجب أن تكون موقعة من مدير في الشركة وممهورة بخاتمها.


وشكراً

[7sam]

شهادة خبرة

التاريخ: 01-01-2000

إلى من يهمه الأمر

هذه الشهادة لتأكيد أن السيد / ة ............................ قد عمل في شركة .................................... في قسم ................................ بمنصب .................................. منذ .............................. وحتى .....................
خلال فترة عمله معنا، وجدنا أنه (يمكن هنا وضع صفات خاصة، والتالي على سبيل المثال لا الحصر) مبادر للعمل وسريع البديهة، قادر على تحمل ضغوط العمل، وفرد ممتاز في فريق العمل كما أنه يملك معومات دقيقة في .................
(مجال العمل).
نتمنى له الأفضل في ما سيأتي في حياته المهنية.


المدير الفلاني
المنصب الفلاني

[7sam]

Experience Certificate

Date: 01-01-2000

To Whom It May Concern

This is to certify that Mr. ………………. was working at ……………………… as ……………… from ……………….. to ………………….

During his tenure, we found him to be (any description) a self starter who is motivated, duty bound, a highly committed team player with strong conceptual knowledge of …………. (Job Field) Moreover, his services were found to be satisfactory.

We wish him all the best in his future endeavors.




John Smith
Chairman of the Board

[blueberry]

بالفعل شغلة مهمة ..

صراحة لو اشتغلت بالمستقبل وبدي غيّر الشغل ماكان خطر عبالي اطلب هي الشهادة ..

شكرا حسام

[nisreen a]

اي والله ياحسامو .. تعيش وتنصحنا مشان ماحدا يضحك علينا ويطلعنا من المولد بلا شهادة خبره


بس المشكله لما بدك تشتغل لاول مره بحياتك من وين بدك تجيبها .؟


لانو صارت من الضروريات لتشتغل شغل جديد ...


وانا قبل مااشتغل بأي مكان بدي اطلب شهادة خبره .. مشان اضمن حقي ...



حكمة اليوم :ان لم تكن ذئبا التهموك الديدان

[7sam]

بس المشكله لما بدك تشتغل لاول مره بحياتك من وين بدك تجيبها .؟

يفضل في أول عمل أن يكون عند أحد المعارف أو الأقارب، في هذه الحالة لن تطلب شهادة خبرة منك. وبعد الانتقال إلى عمل آخر يمكن طلب شهادة خبرة.

شكراً لكم

[يوراميوم]

أذكر 3 أو 4 موظفين في شركتنا لم يستطيعوا أخذ شهادة خبرة بسبب إصرار مدير الموارد البشرية على الإشارة للصفات التي جعلتهم يتركون العمل (السلبية) كملاحظات في الشهادة، والسبب أنهم تركوا العمل بمشكلة مع الإدارة، ربما كانت طريقة للقول "لن أعطيك هذه الشهادة".

[7sam]

أذكر 3 أو 4 موظفين في شركتنا لم يستطيعوا أخذ شهادة خبرة بسبب إصرار مدير الموارد البشرية على الإشارة للصفات التي جعلتهم يتركون العمل (السلبية) كملاحظات في الشهادة، والسبب أنهم تركوا العمل بمشكلة مع الإدارة، ربما كانت طريقة للقول "لن أعطيك هذه الشهادة".
المشكلة أحياناً أن عدم حيازة هكذا مستند يمكن أن يكون عائقاً كبيراً أو كما يقال "خربان بيت".

[JUDY]

أذكر 3 أو 4 موظفين في شركتنا لم يستطيعوا أخذ شهادة خبرة بسبب إصرار مدير الموارد البشرية على الإشارة للصفات التي جعلتهم يتركون العمل (السلبية) كملاحظات في الشهادة، والسبب أنهم تركوا العمل بمشكلة مع الإدارة، ربما كانت طريقة للقول "لن أعطيك هذه الشهادة".


بالضبط رامي ..
صارت معي من قبل .. طلبت شهادة الخبرة قام كتبو فيها : مستوى تدريس مقبول : تصوّر وأنا معي شهادة الماجستير بإختصاص اللغويات !!

شكرا حسامز .. مواضيعك دائما مميزة .. ومفيدة

[thesyrian]

بالضبط رامي ..
صارت معي من قبل .. طلبت شهادة الخبرة قام كتبو فيها : مستوى تدريس مقبول : تصوّر وأنا معي شهادة الماجستير بإختصاص اللغويات !!

شكرا حسامز .. مواضيعك دائما مميزة .. ومفيدة

مرحبا

موضوع مهم فعلا ... بس المشكلة انو الشركات ما بتعطي شهادات خبرة بصورة تظهر تارك العمل لديها قام بمجهود طيب وكان عامل جيد لان غالبا الشركة مالها مبسوطة انو ترك الشغل عندها ...

لهيك هي مشكلة اخرى بحاجة الى حل عملي ...

الي بدو شهادات خبرة فيي اعطيون شهادات منيحة بمجال عملي ;)

سلااااااام

[Yasser S]

حكمة اليوم :ان لم تكن ذئبا التهمتك الديدان


أحد أصدقائي بالشركة لما استقال أعطوه شهادة خبرة تتضمن سطر واحد بس
(عمل لدينا فلان من......إلى........) لأنه كان من "المغضوب عليهم " عند الإدارة.

[Za3bour]

ما بعرف بس برأيي بصراحة ببلدنا لا قيمة للاوراق

سواء شهادة خبرة او شهادة جامعة او شهادات من معاهد او شهادات كمبيوتر يعني الاوراق عنا للبل و الشرب فقط

المهم شو بتعرف و اكبر دليل انو الشركة اذا اتضايقت من حدا يا اما ما بتعطيه يا اما بتعطيه بس ما بتخلي عليه كلمة

[7sam]

في حالات شهادة الخبرة يلعب الدور عاملين:
- رقي الشركة ووضوح خطوط عملها.
- طريقة الموظف في ترك الشركة.

بالنسبة لي مثلاً أرى أكبر خطأ في أن يقوم موظف بترك العمل بطريقة غير جيدة، كأن يترك الشركة في وقت ذروة العمل، أو يترك الشركة وهو يملك الكثير من الأمور التي لا يمكن لغيره القيام بها دون تدريب. ويحق للشركة برأيي عدم منحه شهادة خبرة.
كذلك العامل الآخر العائد للشركة وإدارتها فهو يلعب دوراً كبيراً في طريقة تعاملها مع الموظف التارك للعمل فيها.

[nano_l]

صارت شهادة الخبرة شرط أساسي للتوظيف بكل مكان حتى لو كانت الشركة مو على مسستوى عالي من الكفاءة
ولو رحت تتوظف وكان في غيرك مقدم ومعو شهادة خبرة رح يفضلو عنك
يعني صارت شهادة الخبرة أساس الوظيفة

وهالمشكلة أنا خايفة أوقع فيها
اشتغلت لمدة سنة واضطريت أترك هالمكان بس الحمدلله بالنهاية أخدت شهادة خبرة
وحاليا بشتغل بمكان تاني وحسب المعلومات والحالات يلي شفتها قدامي أنو أد ما اشتغلتي عندون ما بيعطو لحدا شهادة خبرة وهالشي كتير مخوفني
لأنو في الي زميلة بالعمل اشتغلت لمدة 6 سنوات بنفس المكان واضطرت تترك وطلبت شهادة خبرة رفضو انو يعطوها هي فلجأت لأساليب أخرى للحصول عليها لكن للأسف بدون جدوى

يعني الله يستر

[ابوعمار]

يا جماعة صرت مغير 3 شركات و كلهون ما عطوني شهادة خبرة شو رايكون, صراحة عنا بالبلد ما في مصداقية لشهادة الخبرة كتير, لانو شهادة الخبرة هون محسوبية

[Sale7]

موضوع هام و جميل أخي حسام

شهادة الخبرة ببلدنا مشكلتها أنو صعب تحصل عليها .. و السبب برأيي أنو في مرض نفسي متفشي عند أصحاب الشركات و أصحاب المناصب الإدارية و المسؤولين .. و هو أنو
صاحب العمل أو المسؤول بتلاقي عم يتعامل على مبدأ أنو يا بتضل عندي تحت أمري يا إما ما رح خليك تستفيد عن طريقي بشي .. فلذلك أغلب الشركات الخاصة عنا بتلاقيها ما عندها استعداد تعطيك شهادة خبرة .. و إذا بدها تعطيك بتعطيك من باب رفع العتب .. يعني يا بتحطلك ملاحظة بتنزع الشهادة يا أما أنو فلان اشتغل عنا من و إلى و خلصت القصة ..

شكراً عالموضوع المميز أبو الحيس
تحياتي