استفسار حول طاقة الحاسب المحمول

[SooS]

1. في حال استخدامه اليومي أكثر من مرة يفضل عمل :

Sleep , Hibernate or Shut Down ?


2. عند الانتهاء من شحنه ، هل من الأفضل تركه موصولاً مع الكهرباء عن طريق الشاحن ، أم سحبه منه والانتظار حتى تفرغ بطاريته قبل شحنه مرة أخرى؟ وهل يؤثر ترك الشاحن موصولاً بالكهرباء طوال الوقت على سلامته ؟

3. ماهي أفضل طريقة للمحافظة على عمر البطارية ؟


شكراً

[أنـس]

يالله ... أجهز حالي لأجاوب عالاسئلة ...

. في حال استخدامه اليومي أكثر من مرة يفضل عمل :

Sleep , Hibernate or Shut Down ?


ياستي بالنسبة الي : الهايبرنيت أحسن شي لأنك حتكملي من المكان اللي وقفتي عندو ... وبتوفري بطارية كتير ...
أما الاطفاء بيحتاج من فترة لتانية ... مشان تفريغ قطاعات بالذاكرة ما بتتفرغ الا باعادة التشغيل ...

أنا السليب : استعمليه اذا رايحة تشربي مي ... تعملي قهوة : هيك شي ...

الله يستر ... عالتاني :
. عند الانتهاء من شحنه ، هل من الأفضل تركه موصولاً مع الكهرباء عن طريق الشاحن ، أم سحبه منه والانتظار حتى تفرغ بطاريته قبل شحنه مرة أخرى؟ وهل يؤثر ترك الشاحن موصولاً بالكهرباء طوال الوقت على سلامته ؟

ياستي هالموضوع كتير تناقشنا فيو انا ورفقاتي .. منهون اللي بقول انو يخلي البطارية والشاحن موصول .. لأنو الدارة بتفصل البطارية تلقائيا ..
انا بقول لأ .. .
لأنو عمر البطارية بيتحدد بعدد مرات الشحن والتفريغ ... وانتي لما بتكوني واصلتيها عالكهربا وقتها بتشحن وبتفرغ عدة مرات ... مثلا بتفرغ لل99 بالمية وبترجع بتشحن وهيك ...
لسا ما استقرينا عحل أو مين رأيو أصح ...

نصيحتي ..

خلي البطارية عجنب ... استخدميها بس لما بتكوني برا البيت ... وما بيكون جنبك شاحن ...

وهلأ عالسؤال الأخير ...

. ماهي أفضل طريقة للمحافظة على عمر البطارية ؟

ياستي : أفضل طريقة برأيي ...

هيي الاستخدام الطبيعي : بأنو لما تستخدميها بتخليها لبين ما تفضى (يعني لل10 بالمية ) وبترجعي تشحنيها لل100 بالمية ...
وهيك يعني .. مع مراعاة الشاحن وما توصليه وهي مشحونة عالاخير ...

[حسن]

مرحبا بنت خالتي...


خيتو كلام انووس صحيح بنسبة كبيرة, بس في شوية شغلات بدها تصحيح..


1- الإقلاع هو اكتر شي بيرهق الكومبيوتر, لذلك اذا استخدامك اله وقت طويل باليوم يفضل ما تطفيه, الهايبرنيت هي تقنية بتحفظ كل شي عم تعمليه عالذاكرة, مشان ترجعك لمحل ما كنتي تمام, وهالشي مو مفيد ابداً لأوقات طويلة, لذلك أحسن شي هو الـ Sleep بعد ما تحددي خياراته من خيارات الطاقة بلوحة التحكم, وتحددي انو يطفي الهاردات والشاشة بعد فترة 10 دقائق من التوقف المستمر..

اذا الوندوز عندك قيستا ففي خيار اسمه Lock PC من قائمة Start وهاد الخيار هو الانسب لانو اعداداته بالفيستا مدروسة جداً...


ج2: عند الانتهاء من الشحن يفضل سحب الكهرباء فوراً اذا كان الكومبيوتر مطفي, مشان ما تحمى البطارية ومشان ما تستهلكي من حياة الشاحن بحد ذاته..

اما اذا اكتمل الشحن وانتي لسا شاعلة الكومبيوتر فهون خلي الكهرباء مو مشكلة لانو الشاحن عم يشتغل ليشغل الكومبيوتر مو عالفاضي, وبالتالي مارح يحمى او ينأذى..


3- أفضل طريقة للحفاظ على أي بطارية قابلة للشحن هي كالتالي, والكلام من مهندس مختص وشغلته وحدات عدم الانقطاع:

1- عند شراء جهاز ما ببطارية قابلة للشحن, يجب شحنها 18 ساعة متواصلة بدون تشغيل الجهاز, والاستمرار بالشحن حتى لو أعطى المؤشر امتلاء البطارية (وسبب هالشي خو حرق طبقة الليثيوم الزائدة اللي بتكون متراكمة فوق وحدات البطارية عند صناعتها وتفعيل أقصى طاقة للخلايا).

2- أول عدة مرات من التشغيل يجب انتظار البطارية حتى تفرغ تماماً, ومن ثم إعادة شحنها ختى تمتلئ تماماً !! لعدة مرات عند شراء الجهاز..


3- كل شهر يجب تفريغ البطارية على الآخر, ومن ثم تركها على الشحن لمدة 12 ساعة متواصلة حتى لو أعطى المؤشر أنها امتلأت...


كمثال بسيط بطارية موبايلي صرلها سنتين ونص, ولهلأ بتبقى معي يومين ونص إلى 3 ايام...


ملاحظة مهمة: عند شراء جهاز ببطارية قابلة للشحن, فإن أكبر خطأ هو تشغيله فوراً قبل شحن البطارية مدة 18 ساعة..

تحية

[SooS]

شكراً أنس .. أنا كمان كتير سمعت آراء متضاربة بخصوص البطارية والشاحن ، لذلك طرحت هالموضوع لأسمع أفكار الي مجربين أو عندهم خبرة بالموضوع .

حسن ، المعلومات يلي قلتها بخصوص بطارية الليثيوم الجديدة كتير مفيدة ، بس شو بيعمل الواحد إزا ماطبق هالشغلات وقت الشراء والاستعمال أول مرة ؟! بيمشي الحال ازا طبقت هلأ (بعد شهرين من الاستخدام ) نظرية التفريغ لآخر قطرة والشحن لآخر قطرة ؟

وبالنسبة لخيار Lock ، هل قصدك انو يتم قبل عملية sleep ؟ وشو تأثيره على الكهرباء ؟ (حسيت فائدته لقفل الحاسب إذا الشخص اضطر يقوم من عالجهاز لفترة )


سؤال تاني :
شو الفرق بين Critical battery & Low battery ؟



وشكراً جزيلاً ..

[حسن]

بس شو بيعمل الواحد إزا ماطبق هالشغلات وقت الشراء والاستعمال أول مرة ؟!

اول شي عطيني نوع وموديل اللابتوب تبعك, لانو في موديلات فيها خيار باللوحة الرئيسية انو تعمل Refresh للبطارية, يعني بتبلشي هالعملية وبتتركي اللابتوب شي 3 ساعات, خلالها هو بيعل لحالو تفريغ كامل وشحن كامل وبيرجعلك البطارية لحيويتها...

واذا كان ما فيه هالميزة, فبكل بساطة انتظريه ليفضى عالأخير, واشحنيه 18 ساعة, وكمان مرة انتظريه ليفضى عالاخير واشحنيه 18 ساعة.. وبعدين لا بقا تشجنيه الا ليفضى عالاخير, واشحنيه مرة وحدة ليمتلا عالاخير, ولمدة مو اقل من عشرين يوم..

وبتكوني رجعتي حيوية البطارية كونها لسا جديد, اما اذا كانت قديمة فما ممكن ترجع...


وبالنسبة لخيار Lock ، هل قصدك انو يتم قبل عملية sleep ؟ وشو تأثيره على الكهرباء ؟ (حسيت فائدته لقفل الحاسب إذا الشخص اضطر يقوم من عالجهاز لفترة )

هو بالضبط لقفل الحاسب متل ما تفضلتي, بس قلتلك انو بالفيستا مدروسة اعداداته انو بيطفي الهارد والشاشة والسواقة, يعني بيريح اهم 3 قطع ممكن تتعب, وبيوفر من استهلاك البطارية (بس بالفيستا)زز


سؤال تاني :
شو الفرق بين

Critical battery
البطارية شبه فارغة, ولازم تطفي الكومبيوتر فوراً لانو ممكن يفصل بأي لحظة وتخسري اي شغل مو معمول عله save

Low battery
البطارية قربت تفضى, يفضل انك تحطي الشاحن وتكملي شغلك, او تعملي save وتطفي الكومبيوتر..


800 ليرة لو سمحتي

[SooS]

800 ليرة لو سمحتي

باعتبار الدنيا عيد فبدك ماتواخزنا ..

في علبة حلو مشكل باعتها خالتك لخالتي .. بيمشي الحال ؟sh:hi



وشكراً جزيلاً عالمساعدة .

[خليــل]

يمكن رد مالو علاقة

اول لابتوب بشتريه كنت كتير فرحان فيه, بقا اشتريتلو كفالة تلت سنين واتبعت كل ارشادات السلامة والامان تبع البطارية وكيفية تنضيف الشاشة ونفخ الزرار كل فترة الخ... ضليت متبع هالتعليمات هيك لحتى انسرق بعد شي ست اشهر:asefff:

[حسن]

ضليت متبع هالتعليمات هيك لحتى انسرق بعد شي ست اشهر

خليلو اذا انسرق باميركا اللابتوب, ففي شي اسمو Tracking System بيقدروا يجيبولك ياه اذا عطيتهم السيريال نمبر تبعو ;)



واتبعت كل ارشادات السلامة والامان تبع البطارية وكيفية تنضيف الشاشة ونفخ الزرار كل فترة الخ

يعني كأنك نضفت بيتك ورتبته وفرشته ودوكرتو وتركت الباب مفتوح ومشيت :D

نسيت اهم شغلة بالامان والسلامة, وهي انو تنتبه عليه من السرقة !!


العوض بسلامتك حبيب, بس جد جرب تبلغ الشركة تبعو احتمال كبير يجيبولك ياه بمجرد ما السارق يفوت عالانترنت