عرض الإصدار الكامل : معنى إعدادات الـ Iso بعالم التصوير
يوراميوم
06-03-2007, 16:50
يتواجد على بعض الكاميرات الرقمية إعداد خاص بال Iso ويأخذ أرقاماً مثل 100 و 200 و 400
وكذلك كنت أراه على الأفلام الحديثة
كيف استخدم هذا الإعداد وكيف يمكنني توظيفه بعملية التصوير ؟
مرحبا
اخي يوراميوم الايزو بيحدد مقدار حساسية البيكسلز الموجودة على سطح شريحة التصوير بالكميرات الرقمية, او مقدار حساسية حبيبات الsilver halide الموجودة على سطح فلم التصوير بالكميرات العادية.
بالكميرات الفلمية من الضروري تغيير الفلم للحصول على هاي او لو ايزو, يعني الفلم كلو بيجي يا 200 يا اما 400 يا اما 800, كميرات الديجيتال خلت هالشي اسهل لانو بتقدر تتحكم بالايزو من ضمن اعدادت الكميرا.
الايزو بيفيد بحالات التصوير باماكن مظلمة او وقت بيكون الضوء كتير منخفض, بهيك حالات ازا كان الايزو عال100 او 50 لازم تكون سرعة الغالق كتيرررر بطيئة لحتى تقدر تلتقط صورة. برفع الايزو ل200 او 400 ممكن تاخد صورة بسرعة غالق عادية.
الشي السيئ بالايزو هو النويز و الغرينز يلي بيطلعو عالصورة, بما انو الايزو بيحدد مقدار حساسية حبيبات التصوير فكل ما ارتفع الايزو زادت حساسية هالحبيبات اكثر وبالتالي صارت تلتقط موجات اضاءة اكثر. واحيانا بتكون هالموجات مجهولة المصدر او غير موجود بالمشهد, وهالشي بيسبب نويز كتيررر. يعني كل ما ارتفع الايزو زادت النويز وبالعكس. للحصول على صورة عالية الدقة وصافية الايزو لازم يكون 100 او تحت.
انا شخصيا نادرا ما استعمل ايزو فوق 400 يعني بصراحة بلغي مشروع التصوير كلو وما بصور فوق 400. بدال ما ارفع الايزو بستخدم تراي بود او قاعدة للكميرا بحال كان المشهد ثابت وبستخدم فلاش بحال كنت عم صور حفلة او شي متحرك.
طبعا ما بدنا ننسى انو ممكن الانسان يصور بايزو مرتفع ازا كان استخدامو للصور محصور بطباعتها باحجام صغير او بس للنشر عالويب, لانو مع تصغير الصورة بنسبة 50% ولو كان فيها نويز عالي, ممكن نحصل على صورة جيدة نوعا ما .
وشي اخير بتختلف نسب الايزو من كميرات لاخرى وهالشي بيعتمد على حجم شريحة التصوير او السنسر. يعني بكميرات الديجيتال العادية بيكون حجم الشريحة بمعظمها 7.2x5.3mm وكميرات الديجيتال الاحترافيةاو DSLR بيكون حجم شريحة التصوير 23x15mm. وبسبب صغير حجم الشريحة بالكميرات العادية فالايزو 400 لنفرض بيسبب نويز اكتر من ايزو 400 على كاميرا بشريحة احترافية, وطبعا هالشي مالو علاقة بالميغا بيكسل يعني لو الكميرتين قيهن نفس الميغا بكسل. حجم البكسلز على الشريحة الكبيرة اكبر من مثيلاتها على الشريحة الصغيرة, وبالتالي البكسلز الكبار لح يقدر ياخدو اضاءة طبيعية اكتر من البكسلزا لصغار ولح تكون نسبة النويز عليهن اخف.
تحية
خليل العظيم
هلق أنا عندي كاميرا فيها أمر بالإعدادات اسمه Exposure، وعادة برفعه وقت بدي آخد صور متل صور الليل أو شمعة
هو نفس الايزو ولا غير شي؟
مرحبا حسامو
الاكسبوجر او مساحة التعريض بيختلف كليا عن الايزو.
لازم وضح عملية التقاط الصورة قبل ما نفوت بالتفاصيل
وقت بنضغط على زر الكاميرا الرقمية السنسر او شريحة التصوير بيكون جاهز لالتقاط وتسجيل موجات الاضاءة يلي بتتحول من العدسة ,اشعة الاضاءة بتتعالج وبيتم تحويلها لصورة, يعني نفس عملية التقاط الصور بالكميرات العادية.
الاكسبوجر او التعريض هو الفترة الزمنية يلي بينفتح فيها غالق العدسة لحتى يسمح للضوء بالدخول من فتحة العدسة للشريحة مباشرة, وهالفترة الزمنية بتحدد اضاءة الصورة.
يعني وقت بدنا ناخد صورة بمكان مضاء جيدا او صورة خارجية بفترة النهار لازم نرفع سرعة الغالق ل250 او 500 لانو كمية الضوء يلي لح تتحول للسنسر لح تكون كبيرة كتير وبالتالي لازم نخلي فترة التعريض اقصر لحتى نسمح بكمية قليلة من الضوء بالدخول للشريحة. وطبعا كنتيجة صور النهار او يلي اضاءتها جيدة بتكون غالبا افضل من الصور الليلية والسبب هو السرعة العالية للغالق يلي بتكون اسرع من اهتزازات الايد او حركة الاجسام المراد تصويرها, يعني ازا صورنا دولاب سيارة بسرعة غالق 1000 لح نلاقي الدولاب بالصورة كانو واقف وما عم يتحرك لانو بنكون صورنا الدولاب عمليا بفترة تعريض 1000 من الثانية يعني بوحدة زمنية كتير صغيرة.
بالصور اليلية المظلمة لازم نعمل العكس يعني لازم فترة التعريض تكون اطول. يعني فترة التعريض بالصور الليلية غالبا بتكون 30 وما دون. احيانا في صور خاصة بتتطلب فترة تعريض ساعة كاملة وبحالات تصوير متل كميرات البين هول فترة التعريض بتوصل لاسابيع.
لازم ننتبه لموضوع مهم وقت بدنا نصور بالليل وبفترة تعريض بطيئة وهو الحركة, يعني اي حركة او اهتزاز بالايد او بالجسم المصور لح ينتج عنو خيالات بالصورة فاستخدام قاعدة للكاميرا بيكون افضل مع انو احيانا الخيالات الشبحية بالصور الليلة بتكون معمولة قصدا. سبب هالخيالات هو انو طوال فترة التعريض الضوء عم يضل يدخل عالشريحة ويتسجل فوق بعضو واي اهتزاز لح يخلي الضوء ينطبع بغير مكانو وينتج عنو اشكال شبحية.
بعض الامثلة عن فترة التعريض الطويلة.
http://farm1.static.flickr.com/87/280330657_9eb463f6b2.jpg
لاحظ اضوية السيارات كيف مطبوعة عالسنسر من اول الشارع لاخرو, وبنفس الوقت الاجسام الثابتة كمبنى الاذاعة والتلفزيون اضاءتو طالعة جيدة وواضحة لانو ثابت بمكانو.
http://farm1.static.flickr.com/116/284230516_d8be5b93a4.jpg
شوف الشخص يلي عم يبيع مرتديلا كيف جسمو صاير عبارة عن خيال وفي شخص تاني على شمال عربة المرتديلا طالع شفاف تقريبا.
اما الايزو اخي حسام فالو علاقة بدرجة حساسية البكسلز على شريحة التصوير, الاكسبوجر الو علاقة بميكانيكية العدسة او الكميرا اثناء التصوير يعني الموضوعين مختلفين عن بعض تماما ولكن ببعض الاحيان ممكن يشتغلو مع بعض. يعني وقت بنكون عم ناخد صورة ليلية لجسم متحرك وبدنا الصورة تكون واضحة ممكن نرفع فترة التعريض شوي ونرفع الايزو وقت زدنا فترة التعريض وقصرنا زمنها صرنا نقدر نصور اجسام سريعة والايزو بيكون رفع حساسية شريحة التصوير لحتى تاخد اضاءة اكتر ولكن متل ما ذكرت سابقا وقت بنرفع الايزو بتزداد نسبة النويز بالصورة.
يوراميوم
07-03-2007, 11:21
شكراً ألك خليل
الأضواء الثابتة والتي تلتقطها الحساسات على طول فترة التصوير مثل أضواء الحديقة بالصورة الأولى وضوء المحل المقابل لبائع المرتديلا بالصورة الثانية ألا تضر بحساية الحساسات؟
قصدي أنو أستخدام ميزة ال Exposure و رفع ال ISO بيقصر عمر الحساس؟
مرحبا
لا لا ابدا اخي يوراميوم هالشي ما بيضر الشريحة نهائيا, لانو عملياً شدة الضوء او انخفاضو ما عم يزيد التأثير الفيزيائي على الشريحة يلي هو اصلا بسيططط جداااااا ولا يكاد يذكر, طبعا كل كاميرا فيها رينج ايزو مختلف, يعني الكاميرات الاحترافية فيها ايزو من 50 الى 1600 , الكميرات العادية بعتقد فيها بيوصل الايزو فيها للـ600 وهالشي بيحددو قياس الشريحة ونوعها وقدرة الشريحة والبيكسلز, يعني الايزو ما عم يزيد من استهلاك طاقة الشريحة لانو هادا الرينج من الحساسية موجود بالشريحة والبكسلات مصنعين ليتحملو هالرينج من الحساسية.
بالنسبة لميزة الاكسبوجر ازا كان عندك قاعدة للكميرا وعم تستخدم الاكسبوجر الافضل انك تحط الايزو على اقل شي لانو الاكسبوجر لح يتولى تجميع الاضاءة بدون ايذاء الصورة, وحتى اذا قررت استخدامهن مع بعض هالشي متل ما قلتلك ما بيأثر نهائيا على قصر او طول عمر الشريحة.
شو هيي أرخص كميرا Cmos من حواليك ؟؟
مرحبا
اخ عبودي اذا كتير مهتم بموضوع السنسرز بتمنى تنزل موضوع مستقل وتطرح فيه سؤالك بشكل كامل, هادا الموضوع متل مالك شايف مخصص للايسو.
مرحبا
اخ عبودي اذا كتير مهتم بموضوع السنسرز بتمنى تنزل موضوع مستقل وتطرح فيه سؤالك بشكل كامل, هادا الموضوع متل مالك شايف مخصص للايسو.
اي مشان الله ما تآخذنا ...سؤال وسألناك اياه خدنا بحنانك يعني
مرحبا
اخ عبود انتة عم تسأل عن موضوع واسع والشرح عنو يطول, يعني مالك عم تسأل على سعر طابع مالي او تجليد هوية, ولهيك طلبت منك فتح موضوع, ازا كتير زعجبك طلبي مافي مشكلة مالك مضطر تفتح شي.
vBulletin v3.6.4, Copyright ©2000-2009
Translated by SyriaNobles