حوار حول شراء حاسب محمول جديد

[حسن]

مرحبا...

شبكن ؟؟؟

مارح اتجوز لا تفرحوا كتير....


شايفك صفوان انت وعامر بدكن ياها من الله...


اللي نويت عليه يا جماعة الخير هو شراء لابتوب...

صرت شايف كذا عرض, فهل من نصائح ؟؟

بانتظار اللينكات والنصائح

سلام

[7sam]

فتحت عيوني الصبح قلت لحالي معقولة عمو حسن (يلي صار قد جدي sh:eye ) رح يتجوز أخيرا
اسمع مني نصيحة وركز على وزن اللابتوب، تأكد أنه يكون خفيف.
ولا تنسى Wireless LAN على اعتبار أنها صارت شغلة كتير ضرورية

[السيّاف]

مرحبا أخي فتى الشام :
أنا أنصحك أن تركز على طبيعة المعالج أعتقد أنو أهم من وزن الجهاز

يعني يا ريت تركز إنو يكو ديو مو سولو دير بالك أخي فتى بعرف إنو ما إلك خبرة بالأمور التقنية

ويا ريت كمان تركز على شي مهم كمان إنو لا تقع ضحية النصابين اللي بيجيبو الأجهزة من برة بالأقساط لأنو هدول بالذات ممكن يلهفو منك ألوف مألفة من غير وجه حق
وإذا بدك معلومات وافية عن الأجهزة وحابب تاخد إستشارتي الفنية يا ريت تراسلني على الخاص
:)

[vict0ry]

أخي حسون حدد لشو بدك ياه بالاساس

للعب ؟ للانترنت ؟ للتصميم ؟ للتشخيص ؟

[يوراميوم]

قبل المواصفات في عندك أحد 3 خيارات من حيث الشركات:
1. أيسر
2. توشيبا
3. ازوس

يمكن توشيبا أغلاهم بس أحسنهم من حيث الأمور الطرفية والفنية الخارجية، هلق بشكل ضمني بدك تحدد لشو بدك الحاسب مشان ماتدفع مصاري حق شي مابيلزمك

إذا بدنا نحكي عن المعالجات عادة بتلاقي باللابتوبات 4 أنواع من المعالجات
- AMD
- Celeron
- بنتيوم موبايل
- سنترينو
- Dual Core

كل نزلت بالقائمة بيرتفع السعر

بشكل وسطي ومشا ما تتخورف بالسعر

جيب أزوس أو أيسر ومعالج إما سنترينو أو Dual Core والشاشة أحلى إذا بتجيبها Wide ويمكن إذا بتشوف عروض أزوس بينزلو ميزات حلوة مع اللابتوب مثل تشغيل أقراص Mp3 و Audio CD بدون تشغيل الحاسب وبشكل مباشر عن طريق إنترفيس خاص بهذا الشي وبيعطوك كفالة دولية بهذا الشي لمدة سنتين

وكمان أيسر أسعارهم دائماً منافسة وعندهم كفالة

إذا معك بحدود الستين ألف خلي هدول الاثنين خياراتك ، وإذا فينك تدفع أكثر من هيك بوشك على وكالة توشيبا بشارع الثورة

بالنسبة للأزوس فينك تشوفه بمحل سيفا ديجيتال أو شركة الخطيب وهدول الاثنين بالبحصة جنب فندق البرج الفضي (ملاحظة هامة : لا توقف كثير قدام الفندق، بيفهموك غلط) ورح يعطوك عرض ورقي فيه كل الأنواع وبالنسبة لأيسر في مركز الكومبيوتر العربي بالروضة رقمن 3339512

وإذا بتستنالك شغلة 60 يوم بيكون طلع المعرض بتلاقي عروض ممتازة على اللابتوبات يعني بركي بيطلعلك شي طابعة ليزرية مجاناً أوشي من هيك، كثير الشركات بيشجعوا على الشراء بهي الطريقة

مبروك سلف

[7sam]

جنب فندق البرج الفضي (ملاحظة هامة : لا توقف كثير قدام الفندق، بيفهموك غلط)

اسمع مني ووقف خاصة المسا :D

بحب ضيف للي قاله أخي رامي: إذا بتروح على تاون سنتر بتلاقي تشكيلة كبيرة بمكان صغير، يعني بس لمجرد الإطلاع.
وإذا اعتمدت تشتري من الخطيب أو تاون سنتر، احكي معي وقتها. بخليهم يعملو لك سكرة sh:hi

[الدجى]

والله انا مع فكرة اذا الك حدى بدول الخليج يبعتلك ياه من هنيك بتوفر على حالك كتير مصاري بس اتكون الكفالة دولية

[حسن]

فتحت عيوني الصبح قلت لحالي معقولة عمو حسن (يلي صار قد جديsh:eye ) رح يتجوز أخيرا
بعيدة عن سنانكن عميييي قال اتجوز قال...

اسمع مني نصيحة وركز على وزن اللابتوب، تأكد أنه يكون خفيف.
ولا تنسى Wireless LAN على اعتبار أنها صارت شغلة كتير ضرورية

بالنسبة للوزن فكلو وزنو بحدود 6 ليبرا يعني 3 كغ تقريباً اقل او اكتر شوي مو مشكلة, وبالنسبة للوايرلس لان فأكيد كل الموديلات الجديدة فيها هالميزة حتى الرخيصة منها...

يسلمو حسامو


أخي السياف ذكرتني لما كنت بدي اخد اللابتوب تقسيط عن طريق واحد رفيقي نصاب بالكويت sh:hi

بس غيرت رأيي لأنو قال رفيقي انو بيعطوه شاشة مع اللابتوب (هو هيك صار معو) قام طلع الاجدب عم يحكي عن الكومبيوتر الديسكتوب ومفكر الشاشة هدية :D

قصة واقعية على فكرة



أخي حسون حدد لشو بدك ياه بالاساس

للعب ؟ للانترنت ؟ للتصميم ؟ للتشخيص ؟

للعب الله يخليلنا محل كاسبر
للانترنت الله يخليلنا الكافيات السريعة والديسكتوب بالبيت
للتصميم اي ممكن لانو بدي ياه مشان اشتغل عليه بدال الديسكتوب
للتشخيص لا عمي ما رح انتعو على كتفي وين ما رحت واتلبك فيه مشان يقولو هاد عندو لابتوب

اهلين بالحبيب



يوراميوم

ابو الريم العظيم, شكراً كتير لمعلوماتك, بس انا لا بفضل الايسر ولا بفضل الأزوس, بدي شي معروف منيح, محسوبك صرت مجرب الايسر والازوس بزبايني وماشي حالهن مو سيئين بس لما تركب بي ام دبليو غير لما تركب مازدا
وشو مشان عنوان الموضوع ؟؟ sh:angry حسابك المسا بالروم

حبيبنا التوشيبا أحسن شي بالعالم بس مشكلتو بطاريتو مو كتير عم تتضاين, انا اللي عم فكر فيه HP او Gateway هدول مو كتير انشهروا عنا بس برا معروفين كتير وسابقين التوشيبا والسوني بمراحل..

يسلموا ابو الريم عالمعلومات والتلفونات, يا هيك الدعم يا بلا



نرجع لحسام بيك, اي شريك لما اعتمد اكيد رح خبرك لانو السكرة اهم من المواصفات عندي :D

بالتاون سنتر شفت موديلات مرتبة بس أسعارهم أغلى من البلد بمنيح, وأغلى من برات سوريا بكتيييييير

مشكور مرة تانية



أخي الدجى ماعاد كتير فرق سعر دول الخليج عن سوريا, يعني الفرق مو محرز انو نلبك حدا فيه, والا عندي رفقات بدبي وبالسعودية وبقطر اذا حوليك عرض مغري لا تبخل عليي


شكراً شبيبة

[الدجى]

بعتلي اميلك على ال:
BILALSAYAD[at]HOTMAIL.COM
اذا ما بدك تعلنوا هون وانا اح ابعتلك عرض صرلو شهر بالسعودية ولاحظ الفرق;)

[خليــل]

مرحبا

بعرف انو ردي ما كتير لح يفيدك اخي فتى الشام

يوم بعد يوم ومع زيادة استعمالي لكمبيوترات الماكنتوش, عم حس الفرق بين الماكنتوش والبي سي متل الفرق بين العاب الاطفال الاجنبية والالعاب تبع سوق الحمدية.

لهيك اي حدا بدو ياخد رأيي بهالموضوع بدي قلو يشتري ماك لانو شركة مايكروسوفت صايرة معتة و بتشبه اساتذة التاريخ او اللغة العربية.

ماك اخي ماك, ازا عندك استعداد تستغني عن شي 75 الف جيب ماك

[حسن]

بعتلي اميلك على ال:
BILALSAYAD@HOTMAIL.COM

كتر الله خيرك أخي

SooooN@aloola.sy


ماك اخي ماك, ازا عندك استعداد تستغني عن شي 75 الف جيب ماك

المشكلة مو بالسعر خليلوف, المشكلة اني مو ناوي اتعلم نظام تشغيل جديد وفوت بالحيط من جديد, صرلي معاشر الوندوز من أيام 3.11

يسلمو حبيب

[حسن]

شكرا كتير للجميع على ابداء الرأي...

انا اشتريت هاد:

http://www.shopping.hp.com/store/product/product_detail/RP283UA%2523ABA?jumpid=in_r329_search/HP%20Pavilion%20dv6000t%20series_sdp/DV6265US_RP283UA


والشراء تم من اميركا, ورح يوصلني مع قريب بعد 15 يوم

شكراً للجميع

[يوراميوم]

خيار موفق، مبارك عليك وطقم شرائح 950، العز للرز والبرغل شنق حاله

[حسن]

الله يبارك فيك يا حبيب...

لقيتو أقوى شي ممكن استفيد منو كبديل للديسكتوب