Sony تطرح أربعة موديلات كاميرات CYbershot في الشهرين القادمين حتى 10 آلاف ليرة

[يوراميوم]

أعلنت شركة سوني عن طرحها في شهري شباط وآذار القادمين أربعة موديلات من كاميرا سوني CyberShot وبدقة تصل إلى 7.2 ميغا بيكسل والمفاجأة هي السعر

DSC-W35 بسعر 9180 ليرة (180 دولار) تقبل 8 غيغا شريحة ذاكرة وستطرح بشباط القادم
DSC-W55 بسعر 10200 ليرة (200 دولار) تقبل 8 غيغا شريحة ذاكرة وستطرح بشباط القادم
DSC-S650 بسعر 7650 ليرة (150 دولار) تقبل 4 غيغا شريحة ذاكرة وستطرح بآذار القادم
DSC-S700 بسعر 9180 ليرة (180 دولار) تقبل 4 غيغا شريحة ذاكرة وستطرح بآذار القادم

التفاوت بين هذه الطرازات يتعلق ببعض الميزات الإضافية التي تقدمها الشركة مع الكاميرا
وما تشترك عليه كلها
عدسات Carl-zeiss وبطاريات الليثيوم القابلة للشحن

[SAM-SY]

تعلمت درس لما لاقي السعر مفاجىء أنو ما إندهش، لأنو الشغلة بتكون ببساطة.

مايد إن تشاينا.

[يوراميوم]

هههههههههههههههههه
ممكن ، بس هذا الشي منشور بموقع Sony الرسمي وبظن أنهم : مايد إن جبان

أنصحك أن تفاجأ هذه المرة

[خليــل]

مرحبا

شكرا على هالموضوع اخي يوراميوم

بدون شك سوني هي الشركة الرائدة بمجال الكترونيات المستخدم العادي.
سوني قدرت تطرح طرازات وموديلات عديدة من كميرات الديجيتال وكميرات الفيديو وباسعار ومواصفات منافسة جدا ولكن الشي المزعج انو هالكميرات كلها متشابهة يعني مافي هوية خاصة بكل كميرا يعني كميرات السنة الماضية بمواصفاتها المختلفة بتشبه بشكل كبير كميرات هالسنة, من الشكل الخارجي للقوائم الداخلية.

شخصيا بشجع سوني لحد ال300 دولار, فوق هيك في انواع كتير افضل من سوني وبمراحل.

[mazen maad]

هههههههههههههههههه
ممكن ، بس هذا الشي منشور بموقع Sony الرسمي وبظن أنهم : مايد إن جبان

أنصحك أن تفاجأ هذه المرة

يسلمو أبو الريم منيح خبرتنا لأنو عم يوسوسلي الشيطان غير جوالي بقى بتنصحني؟
هلأ حتى الجبناء صارو يصنعو موبايلات؟ أبو الريم .. في المشفى حصل إلتباس;)
بعدين ما قلتلي هالارقام هي علينا كزباين ولا على عمو البياع؟


بكل الحب..اودعناكم

[خليــل]

مرحبا

اخي سام بالنسبة لموضوع ميد اين تشاينا ولا ماليزيا, هالاشياء برأيي مفهومة بشكل غلط بمجتمعنا لانو الادوات يلي بتجينا من الصين بتكون نخب عاشر.

تقنية كميرات السوني المصنعة باليابان مثلا لا تختلف عن كميرات السوني المصنعة بالصين ازا كانت هالكميرات موجهة للسوق الامريكي او الاوروبي, لانو التقنية وحدة والمواد وحدة ولكن يلي بيفرق هو اليد العاملة الرخيصة بالصين.

الادوات الكهربائية والالكترونية الموجهة لمنطقتنا غالبا بتكون اقل جودة من المواد الموجهة لامريكا او اوروبا.
من فترة سنة كنت نازل عالشام ومعي كميرة فيديو وبالصدفة صديقي كان جاية من السعودية ومعو نفس موديل الكميرا, بالفعل الشكل الخارجي نفسو والموديل نفسو ولكن بنظرة قريبة ودقيقة للكميرتين بتلاحظ الفرق الكبير بين المواد وحرفية التصنيع حتى صوت الكميرة هية وعم تشتغل غير رغم انو كميرتو كان شاريها بسعر اعلى, بصراحة ما بعرف شو هو السبب ولكن يمكن لانو شعبنا كلشي بيلاقيه دح ومالو متطلب كتير.

[7sam]

أكبر دليل على إن عبارة Made in china لا تقلل من قدر القطعة التي تصنعها الماركات الشهيرة هو أن كفالة القطعة تبقى نفسها.
ولكن كما قال الأخ غيفارا بالنسبة للقطع التي تأتي دون ماركة مشهورة فهي تأتي نخب عاشر وهذا ما يسيء لـ Made in china.

[يوراميوم]

بالنسبة لهذه الأسعار فهي على ما أظن قبل أن تصل ل "حوا" وكيل السوني وهناك رح تزداد هذه الأسعار ، وآخر مشوار لعند حوا اكتشفنا أنا ورفيقي أنو في قريب ال 40 % إلى 50 %زيادة على سعر الكاميرا المعروض على الانترنت

من ناحية ثانية : مشكلتنا خليل هون بسوريا أنو اغلب الجمهور بده كاميرا فيها بس زر واحد وإذا بيكون هو نفسه تبع الPower و ال capture بيكون أحسن وإذا بتحضر مواقف بيع هيك أجهزة بالسوق بتلمس عدم الخبرة عند الشاري بشكل كبير، مثل مرة كنت بمحل بالبحصة ودار أمامي الحوار
- "شو بتفرق هي عن هديك"
- "هي الأولانية صورتها أحلى من الثانية وبنصحك فيها بعدين هي 6 ميغا بكسل"
- "شو يعني ميغا بكسل"

هون خطر ببالي أنو لوين أنت جاي وشو جاي تشتري إذا ما بتعرف شو هالميغابيكسل وعلى أي أساس رح تقيم المادة اللي بدك تشتريها، على أساس الثقة بالبائع؟ سيكون البائع سعيد جداً بأي نتيجة يتوصل لها معك بهذه الحالة.

الرداءة المشهورة بها البضائع الصينية في دمشق مردها إلى جشع المستوردين ، فحتى الماركات الشهيرة يجلب منها ما هو بجودة سيئة وأحياناً تكون الشحنات الأولى من هذه المواد جيدة ليقدم الجمهور على شرائها وتبنيها كماركة ومن ثم تتوالى شحنات الأنخاب الرديئة من هذه المادة
كما جرى بسواقات TEAC الليزرية منذ 5 سنين ومايحصل الآن ببعض منتجات ASUS و GIGABYTE وكذلك LG طبعاً

[Marc]

واخيرا بع شي 5 أشهر من نزول الكاميرات المذكورة أعلاه على السوق لنزل سعرها بس مو رخصت من الشركة
لا ...ز عمو حوا عيمل عرض مثلا كاميرا دي إس سي - إس 560 صار ثمنها 8500 ل.س ....

وعرض خاص كمان ...
عيب والله ...... عرض أغلى من السعر المصرح به وإيمتى؟؟؟؟
بعد ما نزلت موديلات 2008
هه.
يعني عن جد صرت اتكهرب لما اقرا كلمة سيرفيسيز بجنب أسم حواااا .... يمكن لأنو ما عم شوف أي شي خدمي منو ...
ونعم التفكير....

[يوراميوم]

فعلاً لاعلاقة لمركز خدمات Sony بالخدمات: لم أستطع إيجاد شرائح ذاكرة Memory Stick الموديل الأول لديه كل مالديه Memory Stick Duo

بإمكانك اعتباره "بياع كاميرات Sony وليس وكيلاً"

وجدت هذه الكاميرات تباع في Digital Net أيضاً في دمشق

[حسن]

مرحبا شباب...

خلونا ما ننجرف كتير ور كلمة Sony لانو شركة سوني تعتبر حديثة العهد على الكاميرات !!

واذا كان التلفزيون او الفيديو او المجموعات الصوتية من انتاج سوني هي الافضل, فا شرط تكون كاميراتها منيحة !!!

السنة الماضية لما قررت آخد كاميرا جديدة, استعنت بقرايبي وهو خبير جداً بالتصوير والتصميم الإعلاني, ومهندس معماري الأول على دفعته, وبعدها عامل تخصص غرافيك وملتيميديا بأميركا..

لما سألتو شو الكاميرااللي خرج آخدها, وحطيت قدامو الخيارات, أو خيار استثناه هو كاميرات سوني !!

وشرحلي السبب بشكل ملخص, انو كاميرات سونري لسا ما قدرت توفق بين التصوير الداخلي Indoor والتصوير الخارجي Outdoor يعني موديلات بتلاقي تصويرها الداخلي منيح والخارجي سئ, وموديلات تانية العكس..

وكانت نصيحته هي الكانون أو النيكون, بس بما انو الكانون والنيكون احترافيات كتير, وحجمهم كبير وغاليين كتير, فنصحني اتجه فوراً للكوداك !!

قلتلو عالقليل السوني عم تجي صنع اليابان اما الكوداك كلو اللي هون صيني, فجاوب بكل بساطة وقال انو السوني اللي عم تجي لهون وللخليج مكتوب عليها صنع اليابان, بينما السوني اللي عم تجي على اميركا واوروبا مكتوب عليها صنع الصين !!!

والفرق هو انو اللي مكتوب عليها صنع اليابان, هي عملياً تجميع منطقة جبل علي بدبي !!!!!!

بينما المصانع الأساسية لسوني صارت كلها بالصين, وهاد ضمن سياسة الياانيين بالتوجه للصناعات الثقيلة, فتم نقل كل مصانع الالكترونيات الخفيفة للصين, لتوفير المساحة (بحكم صغر اليابان) واليد العاملة (بحكم رخص الصين).

فلا تنغرو كتير بعبارة Made in Japan..

هي اول نقطة, تاني نقطة انو شركة سوني بتستفيد كتير من السوفتوير, يعني بتعمل اغراءات كبيرة بالواجهات والاضوية ومؤشرات الكاميرا, بتخلي الشخص الغشيم يظن انها شغلة كبيرة هالكاميرا, وبتستخدم بالكاميرا شاشات من انتاج سوني, وهي الافضل بالعالم (الشاشات) فيعني في شوية ابهار بالموضوع, لانو مو همي انو شاشة الكاميرا 2.5 بوصة تكون فظيعة بينما صور الكاميرا تعبانة, لانو بالنهاية هي كاميرا مو شاشة عرض !!!


معلومات مفيدة:
أهم تقنيات سوني, هي ليست من انتاج سوني, وانما من انتاج شركات تانية بتدفع بلاوي عالبحوث والدراسات, ولما بتوصللنتيجة بيكون مامعها مصاري للانتاج, فبتتولى سوني هالعملية..

لما كنت اشتغل بفيليبس للأنظمة الطبية, طلعنا دورة على دبي, وكان المحاضر عم يحكي عن فيليبس كشركة بشكل عام قبل ما يتوجه بحديثه للاختصاص تبعنا وهو الاجهزة الطبية الشعاعية, فمن ضمن الشغلات اللي حكا عنها هي انو فيليبس هنن مخترعين السيدي, والكاسيت !!

وهنن مخترعين تقنية ترينيترون المستخدمة بتلفزيونات سوني !! وباعوا التقنية لسوني ولهلأ الهم نسبة من مبيعات سوني عليها !

وهنن مخترعين اشرطة الفيديو الصغيرة بيتاماكس, اللي كانت سوني مشهورة فيها ! وباعوها لسوني..

وهنن مخترعين شاشات الال سي دي, وتقنية TFT

معلومات بتشيب, فلا تنجروا ورا الدعاية ولا تنخدعوا ابداً, من يوم يومها كوداك وكانون ونيكون ومينولتا وفوجي هم الرواد بعالم التصوير, من وين نطت سوني عالخط ؟؟


تحية

[خليــل]

مرحبا

شعبنا بيحب الماركة, يعني ازا خيرتو بين شحاطة باشايان وبين وحدة توشيبا اكيد لح يختار التوشيبا :d

.

بالنسبة الي بفضل النايكون اولا والكانون ثانيا بالنسبة للكاميرات الاحترافية, اما كاميرات الديجيتال العادية بحب الكاسيو والكوداك, مع انو كاسيو جديدة بسوق كاميرات الديجيتال بس والله اشتريت كاميرا كاسيو من فترة وبالفعل ممتازة كانت.

[خليــل]

بيجوز هالمشاركة خارجة عن الموضوع, بس حبيت شاركن بهالكاميرا يلي بعتبرها من اجمل الاشياء يلي ممكن اقتنيها بحياتي, ورغم انو الشركة المصنعة مو معروفة ابدا ببلادنا العربية ورغم انو شكلها بيشبه الكاميرات الروسي القديمة ولكن كاميرات اللايكا الالمانية تعتبر من افضل الكاميرات بالعالم لانو صناعتها جدا متقنة ومدروسة, يعني ازا بدنا نقربها لعالم السيارات فينا نقول انها بتعادل الرولز رويز.

http://a.img-dpreview.com/articles/LeicaM8/Images/frontview-001.jpg

الكاميرا 10 ميغا بكسل وبيوصل سعرها لحوالي ال5000$ بدون العدسة

[يوراميوم]

حسون ، مافي كاميرا قيمتها دون ال 10 آلاف رح تطرز الفن، أغلب الكاميرات اللي بهذا الحيز السعري ما ح تكون دقيقة.

خليل أنا أحب على قلبي أشتري وطني بس مافي كاميرات هنديكو أو وتار :D

بتقرير حول تقييم الزبائن للكاميرات بالحدود السعرية من 200 - 400 دولار أعطى مشترو الكاميرات ماركتي Kodak و Sony التقييم الأعلى
http://www.consumeraffairs.com/news04/2005/jdpower_cameras.html

أما بالشغلات الكبيرة

http://www.cnet.com/4520-6022_1-102337-9.html


أنا كاميرتي الرقمية صينية :(

[ABBUDY]

حلوة أخبار الكاميرات ..وياريت خليل تهيرلنا كام موضوع عن العدسات لأنه انا خاروف بهالامور وحابب اتعلم بس

(شوي شوي ) ايدنا بزنارك