مــاذا كنت تكتب على طــاولــتك ؟؟

[blueberry]

سلااام شبـــاب و صبــايــــا...

حابـــه نرجع شوي لأيام المدرســة...

أكيد طبعا لكل طالب أو طالبة طاولة مخصصة إلو..وأحيانا لما نشرد عن الدرس كنا نتسلى بالكتابة

أو الرسم عالطاولة (مابعرف انا كنت هيك :ma3qool: )

واللي كان متلي خليه بسترجع أيام المدرسه ويقلنا شو كان يكتب ؟؟؟


بالنسبه إلي كنت أكتب اسمي دائما وأرسم قلوب :hossss:

يلا خبرونا انتو شو كنت تعملوا ؟؟؟؟ :yaturaa:

[ليمون مع نعنع]

أنا لهلأ بحب ارسم و جوه بمختلف الحالات النفسية
حتى على الدفتر اذا لم يتوفر المقعد :)

[STING]

كنت قبل كلّ مذاكرة جيب ورق ( قزاز ) تبع الدهانين و كنت حف المقعد كلو و اكتب الدروس متل ما هيي على المقعد مشان ما اتحمّل منيّة حدى و قت قلو نقلّني .........أيام
:D :D :D

[alfares X]

انا كنت دائما ارسم زهرة و اكتب ذكرى على المقعد والى الان كل مابروح مكان بحب حط ذكرى وطول ماني على المكتب برسم زهرة
آه ذكريات حلوة والله ليتها ترجع

[sweetamoon]

بالنسبة إلي..فالسؤال لألي لازم يكون..((ماذا تكتب على طاولتك؟؟))

لأني لساتي على مقاعد الدراسة:hossss: ...بس يعني ما صفيلي شي..

عضة حجرة ولحشة كوساية:p ..

خلينا بالمهم..بالعادة بكتب حروف رفقاتي..عندي ياها عادة..أو إذا شي غنية علقانة براسي..كمان بنقشها عالدرج..أو بضل بخربش..يعني المهم أنو على آخر السنة يكون الدرج لوحة بيكاسو:D


موضوع ظريف..شكراً..

سلاااااام..أمونة:p

[المنتصر]

أرسم وجه طفل أشبه ما يكون إلى الملاك . له عينان كبيرتان زرقاوتان و كنت أواجه مشكلة في تلوين العنين لأن اللون الأزرق لا يمكن أن يبقى على الطاولة . و كذلك لون الشعر الذهبي غالبا ما كان يذهب بعد يوم أو يومين من رسم ذاك الطفل . لذلك غالبا ما أكون مسلح بذنك اللونين طوال العام دون ملل أو كلل .
إلى وهبنا المولى عز و جل ذاك الطفل حقيقة دون ذهاب الألوان ..

أخوكم أبو اغيد

[السيدة ملعقة]

غالبا بكتب اسمي وبرسم وجوه

وأيام الإمتحانات بكتب الشغلات الصعبة اللي بدها حفظ

[زين الشام]

كنت اكتب دائما اسمي و اتفنن بتخطيطه بكافة اللغات:D

و أحيانا ننقش القوانين عالمقعد أو الحيط وقت الامتحان:hossss:

بس البركة بالشباب لهلأ كلهم كفوين:asefff:

تحياتي

زين

[عابر الزمن]

لم يعد لي مع الذاكرة شي..
ربما نسيت او ------- نعم ربما..

[سيّاب]

كنت اخطط اسمي بالعربي والإنكليزي، بالإضافة الى رسم الوجوه.

ياريت ترجع تلك الأيام.

[blueberry]

شكرا لمروركم جميعا ... وعنجد متل ما قال Exodia يارييييييييت ترجع هديك الأيام

أما يا سيده ملعقه فموضوع اني اكتب شي ماانحفظ معي هاد طبيعي واذا ما في محل عالطاوله عالايد او المسطره السوده ....آآآآآه والله ايام

[nano_l]

أكتر أكتر أكتر شي كنت أكتبو هو توقيعي
وكمان كنت أكتب امثال بالانجليزي وين ما رحت على أي درج أو أي ورقة بايدي لازم اكتبها

وكمان حرف اسمي N بتفنن برسمو

ايييييييييييييه يا ريت ترجع هديك الأيام

[lovely baby]

أنا كنت أكتر شي اكتب اسمي واسم الشخص يلي بحبه
وكمان متل ما قال الزميل nano l كنت اكتب أمتال بالانكليزي كتيييييير

[mazen maad]

أنا كنت أكتر شي اكتب اسمي واسم الشخص يلي بحبه
وكمان متل ما قال الزميل nano l sh:ohmy كنت اكتب أمتال بالانكليزي كتيييييير


حضرتها الزميلة نانو
بالنسبة إلي كنت أكتب عالمقعد رسايل اس ام اس ;) ما كان وقتها في موبايل
يعني يسعد صباحك يا قمر.. كيفك؟ لأنو زميلتي بالبكالوريا كانت تقعد جنبي:hossss: .. شوية معاكسات ما بتضر.. على شوية قلوب على شوية حكم نسيت شو كنت اكتبها و كتير كتير كتير من علامات الاستفهام و التعجب
طبعا غير الجملة المفضلة عندي بوقتها ... مزون مر من هنا

بكل الحب..اودعناكم

[السيدة ملعقة]

مزون طلعت أوعى واحد من الموجدين

[سوري حتى النخاع]

أكتب إسمي و بيت الشعر المشهور ... الخيل و الليل و البيداء تعرفني و السيف و الرمح والقرطاس والقلم ..... و في وسط الطاوله و بالبنط العريض =باطل Co2= :)

[7sam]

بيقولوا الهواية على صغر بتصير مهنة العمر
أنا كنت جيب ورق قزاز ونظف المقعد وبعدين ارسم خريطة الوطن العربي
وبعدين ارسم لوغويات (شعارات) الشركات الأجنبية متل Fila و Adidas ... الخ.

[ابن حلب الشهباء]

ياسيدي انا بأول السنة كنت أجيب (( محاية )) وأمسح وأنظف الطاولة يللي بدها ترافقني طول السنة .... طبعا كلها شخابيط وروسومات (( من شباب أوليين ))

بعدين على الزوايا من فوق كنت أكتب اسمي بالعربي واسمي بالانجليزي

وبنصف الطاولة من أعلى كنت أرسم قلب صغير وفيه حرف اسم حبيبتي

أما باقي الطاولة يللي ما ساويت فيو شي ..... (( بقسم الطاولة على أجزاء ))

محل بكتب فيو (( الراشيتات )) بالامارات بقولوا عنهم ...(( براشيم ))

ومحل برسم فيو كل استاذ .. (بهئة مضحكة ... مشان أضحك عليهم إزا مليت من الدرس ... وبالعادة انا كتير بمل منهم :D :D )

ومحل بكتب فيه أسامي الطلاب ...(( يللي دائما بفسدوا )) مشان أتم آخد حذري منهم

ولاباقي بستخدموا للبراشيم كمان

.
..
...
.... (( مرة بتذكر تمت الطاولة سنتين معي ... دورت على طاولتي بكل المدرسة ولاقيتا وتمت معي سنة كمان ))
...
..
.

يعني بالمختصر طاولتي خريطة مرتبة

.
.
.

[blueberry]

أما والله طلعتو كلكن فنانين ....

mazen ..عجبتني هي المعاكسات..

ابن حلب الشهباء ..منظم طاولتو والله شي بالزاويه وشي بالنص بس ماكانو ينظفولك ياها ؟؟ :yaturaa:

وعفكره انا كنت ارسم قلوب واسمي واسم حبيبيي ..بس خجلت احكي من أول :hossss:

[anas1717]

من كتر ما كانت المقاعد قديمة و مهترئة و مكتوب عليها بالأصل مئات الملخصات , كنا نكتب بس على الحيط ..

عبارات تكتب أول السنة :

منرسم زر , و بنتكب ( اكبس الزر يختفي الأستاذ )

أو ( اكبس الزر يختفي الطلاب )

أو ( يمنع دخول الأساتذة و المدراء و غيرهم من الرجعيين و العملاء ) ... بس هي كتبانها مرة وحدة بصف التاسع , و المدير جاب دهان و دهنوا محلها , و طبعا كان صفنا يد واحدة و ما حدا فسد عن يلي كتبها , فعاقبونا كلنا بمشية البطة 20 دورة حوالين الباحة .... ضليت معضل 3 أيام بعدها ...

[يوراميوم]

كتبت مرة .. كلما ازدادت معرفتي بالناس ازداد حبي لكلبي

وأكلت عليها طيارة من الموجه

[fefeeeee]

كنت دائما أكتب هذه الابيات لنزار قباني

آه يا شام.. كيف أشرح ما بي
وأنا فيـكِ دائمـاً مسكونُ
أهي مجنونة بشوقي إليها...
هذه الشام، أم أنا المجنون؟
شام.. يا شام.. يا أميرة حبي
كيف ينسى غرامـه المجنون؟

[عذبة]

الموضوع كتيييييير حلو وشدني...
كنت بكتب ومازلت أسم ((كـــــــــاظم الساهــــــــر)) في كل مكان ...كنت بكتب أغانية
خاصة القصائد الطويلة....وكنت راح أنحرم من دخول الامتحان لاني كنت كاتبة علي طاولتي قصيدة (في مدرسة الحب) ...بس كتبوني تعهد في الاخير..
واكيييد كنت اكتب أسمي ((هنــــــــــــــــــــوودده))
كمان في بيت شعر كل مامسكت القلم بلاقيني بكتبه بلا شعور وهو للأعشي:
ودع هريرة أن الركب مرتحل.....وهل تطيق وداعا أيها الرجل

[vict0ry]

أنا ما كنت أعرف أكتب اساساً هههههههه

لا كنت أكتب اسمي كنت معجب فيه مع أنو خطي معفشك

[ياسمين]

أنا كنت بأول كل سنة بس إرسى على مقعد أكتب عليه:

كرهت حبكم لا بغض فيه ولكن كثرة الشركاء فيه
إذا وقفت ذبابة مرة على طعام كرهته ونفسي تشتهيه
تأبى الأسود ورود ماء علمت أن الكلاب تلوغ فيه

وتحتها بوقع وبكتب :
مع كامل حبي
سوسو


آخ ياريت ترجع أيام المدرسة



ياسمين الشام

[عاشقة الدمعه]

أنا كنت حب الرسم كثير ارسم باخرة قديمة في عرض البحر
ارسم أحصنة وخيول وهي عم تركض

ياريت ترجع الأيام

[juventus]

الموضوع مكرر .......... يمكن sh:eye


http://www.shabablek.com/vb/showthread.php?t=31497

[lovely baby]

عن جد شي حلو كتير........
يعني المهم بالأخير طلعنا كلنا ما منهتم بنظافة المقاعد بالمدرسة........... ;) ;) :hossss:

يعني..... اذا استاذ من الساتذة أو اّنسة من الاّنسات يدخلو لهون ويقرأوا.....رح يدعولنا واحد واحد بالهداية sh:eye

[blueberry]

الموضوع مكرر .......... يمكن sh:eye


http://www.shabablek.com/vb/showthread.php?t=31497



بعتذر منك ..بس ما انتبهت :asefff:

[التحديات]

حلو الموضوع جد
ههههههههههه ما أحكيلكم بضحكو جد هههههه جد لما بتذكر بضحك
كانت مدرستي دوامين دوام شباب ودوام مخلوقات عفواً بنات ... بقا كنت أكتب كل يوم عبارة للبنت هلي لح تقعد مكاني........:
أحزري هذا مكان المعلم أوعك تكوني كسولة أو مشاغبة ما بيقعد هون غير المعلمين مثلي
بس كنت أجي تاني يوم لاقيها ممحية ومكتوب شي مسبة sh:ohmy
وعلى الحال كل يوم أو يومين أنا أمحي وأكتب وهي تمحي وتشتم
لا حدا يضحك sh:angry

أخ من المخلوقات :D





سلاااااااااام

[وردة جورية]

بالمدرسة كنت اكتب اسمي واتفنن بالخط ..وكنت اكتب اي شي بدل على حالتي النفسية بوقتها
يعي متل حكمة او غنية او مثل
وكنت ارسم وجوه بمختلف حالاتا



بس هلأ بالجامعة مع انو في طاولة كبيرة الي مخصصة وحلو كتير الكتابة عليها بالرصاص بس ما بعرف ليش ما بكتب عليها :lahlah: ................ ايييييييييه ايام